Ohne Titel

వస్తా ఉత్తదీ పోతా ఉత్తదీ 
   ప్రయాస యెందేకో ఓ జీవా! 
మేలు చేసినా కీడు చేసినా పునర్జన్మ తప్పదే ఓ జీవా! 
పంచభూతములు సప్త ధాతువులు 
   యింతే దేహము ఓ జీవా! 
ఉండీ పుట్టీ పెరిగీ మారి కృశించి పోవునే ఓ జీవా! 
పంచ ప్రాణములు ఉపవాయువులు 
   యింతే ప్రాణము ఓ జీవా! 
ఆ ప్రాణము లెగిరి పోయిన, నీవెవరవె ఓ జీవా! 
పంచకోశములు శరీర త్రయము
    నీవు కాదు కదా ఓ జీవా! 
ఇవి నిజమేనని భ్రమసి చేసేవు అనాత్మ క్రియలు ఓ జీవా! 
ఐదైదులును వాని క్రియలును 
    నీవు కాదు కదా ఓ జీవా! 
బుద్ధిహీనమై మాయల మారికి లోబడబోకే ఓ జీవా! 
గురువే తత్తు శిష్యుడె త్వమ్ము 
   అసి పద మెరుగవె ఓ జీవా! 
గురు సాక్షాత్ పరబ్రహ్మము 
     విశ్వసించవె ఓ జీవా! 
గురువే శిష్యుడు శిష్యుడు గురువే 
    గుర్తొక్కటే కదా ఓ జీవా! 
అహంభావ రహితమే అద్వైత సిద్ధి కదా ఓ జీవా!